بلوچ کومی کامیابی گون تپاکی ا نت                                                                 

په پهکین بلوچان المی انت که مان وتی زندا په وتی وایستا په راج و کومی وشهال و آباتی هاترا کم چه کم کاری بکن انت که بلوچ و بلوچستانی واستا یک مستاگی ببیت.

بلوچ کوم مان ایرانا اچ چنت چیز زبهرانت: زبان( کومی نابرابری)؛ دودوربیدگ(دودو ربیدگی نابرابری) و سرزمین(اجتماعی و گزرانی نابرابری). ما اچ هر سين(3) سیاسی و دودوربیدگی و هنچوش گزرانی و اجتماعی کار و چلهپگان زبهر انت. په همی هاترا بازین بلوچی ڈن اچ بلوچستانی گل زمینا درانڈیه انت.

مان یوروپا مارا ای موکل رسگاانت که وتی سیاسی و دودوربیدگی کارو چلهپگانی واستا جد و جهد بکنین.

لهتی اچ دودوربیدگی و سیاسی دانشور و کواسان گون وتی جدوجهدان گون ای نوکین پدریچا سجين رکات پروشتگ و بلوچستانی نام و توار اش تا اندازگی مان ای دگه ملک و دمگان رسینتگ و من ایشیا مزنین گامگیجی په بلوچستان و راجی هورکاری و بلوچے مچی و تپاکیا زانان.من اچ ای واجهان دزبندی کنان که آ، هرچی زوت تر وتی جهدان په بلوچ ے تپاکی و مچیا وتی گامان تیزتر بکن انت و وتی بزگین و لگتمالین کوما اچ ای بزگیا نجات بدینت.چیا که هنوگین هالت بلوچانی اتحاد وهورکاری چه هر زمانگی  دگه گیشتر بوتگ. بلوچ زانتکار و کواس باید انت که چه هر چیزا پیسر اتحاد و هورکاریا گون وت بجیریین.

سنگتان، واجهین برات و بانوکین گوهاران!

ادان المی زانان تپاکی ء یک گوندین مسله شمی هذمتا پیش کنان تا بتوانان تپاکی و هورکاری ء شرتر شمئی هذمتا درشان بکنان و آ اش انت که:یک بش و دکالی زمانگی ات مان  یک کلگی  دو برات نندوک ات انت. بزان ای کلگی پهکین آمدنی چه هما شهری ناه و دان ات. یکی چه ای براتان گون وتا شور کت که لاپی شوهازا دن چه ای کلگا بروت.ای واجهء وتی چک و چوریگ زورت و وتی پوروکانا مه یک کچوی کت ودیم په دگه اباتین ملکیا رهادگ گپت انت. گپری راهی روگا چه رند یک درچکیء چیرا داشت اش . مردا سر لک کت دیستی که درچکی سرا یک چاهیگی نشتگ گرا مردا وتی پلیتگین تپنگا چه هورجینا کش ات و وتی لوگبانوکا توار پر جت،او کروکی مات برو لوهیگا آپ مان کن که ای چاهیگ مئی و شمئی سبارگ انت. کروکی مات هما دمانا پاد اتک و دیم په لوهیگا رهادگ گپت.چاهیگا چه درچکی سرا دراینت که او مرد تو په منی کشگ و ورگا سیرنبئی ، برو آ گزی چیرا بکونچ هزانگی کل انت، مردا هزانگ کش ات و دوبارگ دیم په وتی کلگا واتر بوت.واجکارا پهکین کسه براتی گورا آرت. براتا همی راها گران کت و هما درچکی چیرا وتی بارو بنگ بوجت هما چاهیگ گون هما نشانگا درچکی سرا نشتگ ات. مردینا جنین  توار پر جت وگوشتی او لالوکی مات برو.....لالوکی ماتا دراینت اوه پر تو بات مرگ انگت درچکی سراینت تو پیسر مارا آدر دئی  که ای بکن و ا بکن. چاهیگا دراینت که آ دگه مرد ات انت  که هزانگ اش نسیب بوت. چاهیگا ای هبری کنگا چه رند بال کت.

یک رندی دگه  من اچ وتی زردی جهلانکیان ای دودوربیدگی ؛ سیاسی دانشور و زانتکارانا مبارک بات گوشان و منی مراد و واهگ انت که ای بیست و یکمی کرن په بلوچ و بلوچ کوما ردوم و کامیابی بیاریت.چیا که بلوچی کامیابی گون آهی ی  تپاکی و هورکاریا همگرنچ انت.

                                               مندوست  سربازی   

                                                   040501