گند و نند: ملنگ سربازی گپ و ترانے گون ابلیسین شیطانء
گند و نند: ملنگ سربازی
پجار:
ابلیسین شیطان مان سال 1348ء مان جهنمء کسانین کلگے بزان (کوشق) پیداگ بوت. آئےء بنداتی سبک ء چه پلینڈانی سبک جاه ء وتی دیپلمء پاس کت و پدا په اے تعلیمے دیم برگے هاترا جهنمے مسترین آباتی بزان قم* ء شت.و مان قمے مسترین پلینڈانےسبک جاه ء پی ا چ ڈی ء مدرک (سند) گپت.من گون ابلیسء گند و نندء کت و چه آئیء بازین سیاسی مسله هان چوش که بلوچ کومئے سیاسی و،راجی اڑ و جنجالان وهنچوش اے دگه جیرهانی بابت ء گپ و تران کت
ملنگ: سلام ابلیس
شیطان: سرو گردن بے ملنگ!
ملنگ:واجه شیطان باز وشان که وتی گرانکیمتین وهد اشتگ و...
شیطان: زوت کن وتی جستان بکن. پوتاری منا وش نبیت. وهد کم انت همئے هنون منا شبینگ بیت که دو بلوچ طائفه مان مکرانا گلایش انت که سهل و سلاه بکن انت . منی پرز انت که اے سهلء ناکام بکنان. زوت کن ترا چه گوشگی انت بگوش ؟!.
ملنگ: منی اولی جست چه شما، شمئے زاتی بارواانت و آ اش انت که تئی نام کئے انت و کجا نشتگے؟
شیطان: منی نام شیطان انت و لهتے چه زهرو هژما ابلیس و ملعون هن گوشنت و چونائیا من قم نشتگان.بلئے بلوچستان ء سجئین کنڈ و دمگ منی لوگ انت.
ملنگ: شما چنت برات و گوهارات؟
شیطان: زانی ترا من بس نهان؟ هاهاها... منی برات و گوهار باز انت واجه.
ملنگ:اگه بوت کنت توانے چنتے نام ء بگرے
شیطان: جی هو، خمینی، خامنه ای ،احمدی نژاد، جنرل مشرف،صدام، هیتلر، رفسنجانی، شارون......چونائیا هنوگین دورے گیشترین ملکانی رهدربر و هنچوش گیشترین سیاسی رهدربر و لیڈر!! مان بلوچستانء منی برات و گوهاربوت کن انت.
ملنگ: تو وتی مدرک چه رشته ے ء گپتگ؟
ّّشیطان: پلینڈی،وت مان وت جنگ دئیگ،کشت وکوش و هرابکاریے پی اچ ڈیے مدرک من گپتگ.
ملنگ: ترا وتی کجام کار گیشتر یات کاینت؟
شیطان: منا گورناگے بمباری،باهوکلاتے بمباری،بلوچ کومے ایر جنگ ،سراوان ،کنارک و زاهدانے بے گناهین بلوچ ورنایانی هونے ریچگ زاهدانے مکی مسیتے بمباری،ڈیره بکٹی و کوهلوے جنگ و پترنگان، هیرو شیما ء اتم بمبے پٹینگ ،مان لبنانا، صبرا و شاتیلا بمباری ومان کردستانا خلبچهء زهری گئیس ریچگ ء هاتره گیشتر یات کاینت.
ملنگ: تئی گیشترین ناراحتی و پریشانی کجام انت؟
شیطان: هر کس که تپاکی و اتحادے گپا بجنت هاس بلوچ کومے ، گڑا من سک باز پریشان و بدهال بان.
ملنگ: تئی مکسد و مراد هاس بلوچستانے باروا چی انت؟
شیطان: منی اولی مکسد و مراد اش انت که بلوچ کوما وت مان وت بیمڑینان و اودان کشت و کوش و تباهی بیاران. دومیگین مکسد اش انت که جهانے اے دگه کومانی تها ناتپاکی و جنگ وپترنگ دور بدیان.
ملنگ: کئے سرا گیشتر بش بش ورے؟
شیطان: من آهانی سرا گیشتر بش بش وران که آ بلوچانی تپاکی واتحادے گپا جنگا انت و منا سکین زهرے اے واجهانی سرا کئیت.
ملنگ: تئی نزیکترین سنگت وساڑے کے انت؟
هنچوش که من پیسرا ارز کت، منی هنوگین سنگت و ساڑے خامنه ای،احمدی نژاد، رفسنجانی،جنرل مشرف،صدام و اسامه بن لادن انت. چونائیاتو اے گشت کنے که اےزمانگے گیشترین رهدربر منی سنگت و ساڑے انت.
ملنگ: تئی هیالا دگنیایے مسترین تکنولوژیے دیمروی کجام انت؟
شیطان: منی هیالا دگنیایے مسترین تکنولوژیے دیمروی اتم بمب ، اف- 52بالیگ،شهاب1.2.3.4،حاتف و زهری گئیس انت .
یک اتم بمبء یا که زهری گئیسء ویل بکن سجئین دگنیا سر و چیر بیت.اے سجئین کوم کوشین سلاح چه منی علم و کراماتان جوڑ کنگ بوتگ انت.
ملنگ: ترا کئے گیشتر یات کئیت؟
شیطان: تو چیا اے باروا اینچو جست کنے. هنچوش که من پیسرا گون ترا ارز کت ملا خمینی ، خامنه ای،احمدی نژاد، جنرل مشرف، صدام ،هیتلر، اسامه بن لادن و لهتے دگه منا سک یات کاینت .
ملنگ: پرچے ؟
شیطان: په اے هاترا که چیزے که من لوٹان و منی پی اچ ڈی ء مطابقء انت اے واجکاران مان وتی ملکان دیما برتگ و انکت لهتے چه اهان که زندگ انت دیما برگا انت.چوش که ملا خامنه ای و احمدی نژاد و جنرل مشرف۔
ملنگ: واجه شیطان بارین بگوش تئی آیندگے پروجکٹ چی انت؟
شیطان: منی آیندگے پروجکٹ بلوچ کوما گیشتر ناتپاک کنگ و بلوچانی اندرونی اڑ و جنجالانا مان اے دگه کومانی تها پاشک کنگ و آهانا وت مان وت میڑینگانت. اوهنچوش میان استمانی مزنین جنگے بنگیج کنگ و آئیا چه رند گون اے نوکین تکنولوژیا سجئین دگنیا تباه و بربات کنگ انت.
ملنگ: کجا وهدا وتا را بے وس گندے؟
شیطان: وهدے که بلوچ کوم تپاک ببیت و هنچوش وتی زات و جریات و ضد و حسدا دور بکنت
ملنگ: من تئی باز منت واران که شما بازین جست و پرسانی بابتا وتی گپ درشان کت انت.
شیطان: من ھن تے سک باز منت وار که منا جست و پرس ات کت.
شیطانا وتی هبرانی کنگا چه رند،اچ منا دزبندی کت که آیے ے باسک جور ببان و چه بلوچے متحد کنگ و بلوچ کومے تپاک کنگےجار جنگان وتی دستا بکشان.
همئے درگتا من گون مزنین توارے و هژمئےکوکار کت و گوشتان:ابلیسین شیطان، ملعون،خبیس او شومین شانزه پادا چه ادان وتی شکل ءگم کن مئیگ و تئیگ گپ و تران چه همدان هلاس....
واجهین برات و حاتونین گوهاران!
شیطانین ملعون گرک بوت و شت . من چه شما پهلی لوٹان و په شمئے اجازتا رکست بان و روان۔
چه شما دزبندی کنان که اے ملعونے هبرا مگرات و وتی کشک و وتی راه و مادنءکه هما تپاکی، هوری و مچی انت بگرات.
امیت کنان که اے گپ و تران په شما هچ پیمین دلپروشی و نگیگی ے په بلوچ کومے دیمرویء میاریت و بلوچ کومئے کاروان وتی مکسدا که هما تپاکی، اتحاد،مچی وهورکاری ،رندا په وتی وت واجهی و وت مستری انت سرببیت.چیا که تپاکی بلوچ کومےکامیابی انت.تپاکی هر کومئے ء سلاح انت په حقانے گرگے واستا.
تپاکی و هورکاری اچ ج.ا اتم بمب و آهانی دورجنین راکٹان وهمچوش چه پاکستانے شاهین وحاتفے راکٹان دیماتر و زوراکتر انت.
تپاکی ء یک گونڈین مسلے شمے هذمتا پیش کنان و آ اش انت که:یک بش و ڈکالی زمانگی ات مان یک کلگے دو برات نندوک ات انت. بزان اے کلگے پهکین آمدنی چه هما شهرے ناه و دان ات. یکے چه اے براتان گون وتا شور کت که لاپے شوهازا ڈن چه اے کلگا بروت.اے واجهء وتی چک و چوریگ زورت و وتی پوروکانا مان یک کچوے کت ودیم په دگه اباتین ملکیا رهادگ گپت.گپڑے راهے روگا چه رند، یک درچکیے چیرا داشت اش . مردا سر لک کت دیستی که درچکے سرا یک چاهیگی نشتگ گڑا مردا وتی پلیتگین تپنگا چه هورجینا کش ات و وتی لوگبانوکا توار پر جت،او کروکے مات برو لوهیگا آپ مان کن که اے چاهیگ مئے و شمئے سبارگ انت. کروکے مات هما دمانا پاد اتک و دیم په لوهیگا رهادگ گپت.
چاهیگا چه درچکے سرا دراینت که او مرد تو په منی کشگ و ورگا سیرنبئے ، برو آ گزے چیرا بکونچ هزانگے کل انت۔ مردا هزانگ کش ات و دوبارگ دیم په وتی کلگا واتر بوت.
واجکارا پهکین کسه براتے گورا آرت. براتا همے راها گران کت و هما درچکےچیرا وتی بارو بنگ بوجت هما چاهیگ گون هما نشانگا درچکے سرا نشتگ ات. مردک جنینا توار پر جت وگوشتی او لالوکے مات برو.....لالوکے ماتا دراینت اوه پر تو بات مرگ انگت درچکے سراینت تو پیسر مارا آڈر دئے که اے بکن و ا بکن.
چاهیگا دراینت که آدگه مرد ات انت که هزانگ اش نسیب بوت. چاهیگا اے هبرے کنگا چه رند بال کت.
ملنگے مراد و واهگ انت که اے سال په بلوچ و بلوچ راجا ردوم و کامیابی بیاریت.
ملنگے مراد و واهگ انت که اے سال په بلوچ سیاسی گل و پارٹیان، تپاکی و مچی بیاریت .
ملنگے مراد و واهگ انت که بلوچ زانتکار و کواس چه هر چیزا پیسر، اتحاد و هورکاریا گون وت بجیڑین انت. چیا که بلوچے کامیابی گون آهیے تپاکی، مچی و هورکاریا همگرنچ انت. مچی و تپاکی بلوچانے حق و حقوکانے گرکے کشکا تچکتر و نزیکتر کنت۔ شالا که هنچوش بات.
قم*،میتگے انت مان ایرانا که اودان پلینڈانے مسترین سبک جاه انت. آخوند(ملا) وتی پی اچ دی ء چه اے سبک جاهء گرنت