بلوچستان  اینفو

گنجين ماه وَل

موسمي ترّ هوران خَلف چها خيمه زَدي

آ گِسد رنگين كَهربا شَنزانت دردي

پر تماشاي رپتگون سيلان نَدي

من چراگ جاﮌين شانتگان گُل بيتگ ودي

مات و باجيگي گون اَتان كسما چارسدي

من بسي سسّا كرتگ و واگَشتون پدي

سَر مني سنگين اَت پما گنجين ماه وَلا

من هبر گپت چه احمق و دَروهاني دلا

دل چيا شيدا والهَ ي نالي په گُلا !

يا سري سودا آ بدَي سد مسكال تلاه

يا مه اَنديش و پيش كَپ گون مَردِي توكل

يا كني سوب ياوري نيشا سَد بلاه

گون من اَت يك ﮈكين سپاهاني ديگري

چپّ ملّان و راستا په كارچي مهتري

شاده و پَر گولا و تماشاي كوتري

كوچوا بيگاها جُر بند اَنت نود زِري

اَمن كنت كابزّگي سرا كشّيت كوكري

رَتكگين دَرْنگي گپتگ اَت كُمريان سَنّت

بِي گَت اَنت وت كه همنشين ماه و من اَت

ماهُ مادن مان شُشتگين سياهبندي جم اَت

آ زِهي كتّار بَستگين مرگاني رَم اَت

طوطي گون بانزا چو سهيل تيگيگا شم اَت

شَدرين آهوگ مان تَنگدَپين گَتَي نَگر اَت

كاگدين باجگيرِي نپر سياهين چاكران

كُندي زرّي مان كَلّها گوري مُحكمان

بيگناه كيدي مان كماناني سر شمان

بيد و بيرك مان جُتكگين جُوّاني سران

تيتلي گُلگ گَرگ چه رُخِي درْمان گوْستگان

تَهتَگَي چيني په دو كُبل هاموش بَستگان

تاگچهَي نكشين په دوسَد سيما رستگان

تير و بَند از تهت سليمان اير گِستگان

ريزه و دهكان گون سَدان اندر جنگ اِتان

مرگ زَرّي مان باريگين چوبان دَرْنگ اِتان

هَردَهين نخلاني ثمر هوني رَنگ اَتان

موسُمي تُرْنجان مان گوْري ديمي گران بَران

گَرك اِش اَنديمان رَطب چه شينكان دَران

شَربَتي جاﮌين چو نهالا نوك رُستگان

كالب و قَدّان نيكه چه قيامان كِستگان

نُگرهين ميهـ اِش نيكه چو چوتان گوْستگان

دورِ الشَمْسا بُرْ اِتگ و ليلا تَتَگ

سياه جهانگيرا مان بر سر گيِديا جَتگ

چاكران دوران شَشتگكين آچار كَجْ اِتگ

پُلّي مان باگا ديتگ و تيگون سَجّ اِتگ

قالبي اَستان جوﮈ بيت نامي لَب شَكر

يكّي پنچ سَد و چار«ب» و سي و «د» دار اِيت قَمر

دومي سي سد و پنجاه يازده سد شش دارايت قَمر

اَچ چِد و ديما نام گُل بيتين چير و سَر

اَبجدا سسّا كن اگر دانايَي ستر

بَسكن او فاضل دوزخِي آسا كن خطر
ملا فاضل